6. 生完仔身裁會走樣, 會有肚紋, 會變肥師奶; 西會變大, 老公會嫌棄大西同肥師奶而包二奶.
開刀生會有疤, 不過比大西好.
7. 細路大左會駁咀 / 自作聰明 / 懶得戚 / 通屋跑加尖叫加扔野, 又唔可以鐘巴佢.
8. 細路讀書要教佢做功課, 我本身 Math / Physics / Geography / History 肥佬, 點教?
如果比阿仔笑番轉頭好樣衰嘛.
9. 細路又懶又曳, 朝早唔願起身 / 夜晚唔願訓 / 揀飲擇食 / 唔肯溫書掛住打機,
你叫佢乖 D 佢又嫌你煩 / 話你日哦夜哦. 簡直好心做壞事做乜要作賤自已呢?
10. 小兒科價錢並唔小兒科, 都係o個句 : 好貴.
11. 細路再大 D 到青春期仲衰, 更反叛. 男既會打交/食煙/隊草/酗酒/溝女/爆粗鬧你;
女既會用你d 錢買衫/化妝/發姣/大肚, etc.
12. 讀大學好貴, 留班仲貴, 如果留左幾次班轉左兩次科到廿五歲都畢唔到業我就退休金都蝕埋俾 d 仔.
13. 阿仔會養番你, 生仔係長線投資? 請唔好天真. 老豆養仔 仔養仔, 呢種投資成本大 風險高, 同過大海賭錢有乜分別?
14. 為傳宗接代? 爸爸同叔叔共生四個女, 姓江既到我呢代就停左, 佢地都唔介意冇追仔, 我做乜要接代呢? 我只能幫白文家族接代, 可幫阿仔改名白文伊蚊 (Eman Blackman).
15. 為生活增添歡樂, 令生存帶來意義? 我好滿意我既人生, 對現狀更甚為滿足. 並唔覺得要犧牲金錢 時間 精神 事業 身裁, 換來以上種種難受可以帶來更多歡樂? 好冇說服力.
16. 除非男友突然事業特飛猛進, 人工翻三倍 : 由僅夠養自已到能養一家四口連供樓. 佢就可以請我轉行做全職賢妻良母 (再 Part Time 賣首飾賺私己錢). 否則我絕對冇動力叫自己番完一日工放工仲要煮 4 人飯+洗碗+執屋+洗 b + 換片+掃貓房+執貓屎+餵貓+叫仔訓覺, 再被喊醒十次+嘔奶抹奶十次, 一晚訓唔夠四個鐘第二朝再六點幾起身再番工... 完全唔係我要既生活.
17. 結婚生仔唔係我既夢想. 我既人生目標就係要開心, 要做設計師, 要有錢 ( = 唔窮), 要 Free ( = 可以隨意旅行隨意移民), 已經達謤了. 如果生仔就會做唔成設計師 + 會冇錢 + 唔 Free + 加上唔夠訓就會唔開心 = 就等於破壞自己既人生目標, 傻既咩?
18. 細路仔好得意可愛? 賴屎賴尿嘔奶都可愛? 細路到九歲起就唔得意架喇, BB 會長大架嘛.
如果真係咁鐘意 BB, 可以到托兒所 / 孤兒院做義工.
19. 我身邊冇乜細路, 要數就只有男友叔叔 (60 歲, 大仔 30 歲) - 男友叔叔有兩個細仔四歲同三歲,
兩隻化骨龍黎過過一次夜, 星期日神早七點訓醒就開始追黎追去 / 用發聲電子槍打打殺殺 / 銀芽銀芽地炒菜 / 不時又搞喊細佬曳到飛起.
帶佢地去遊樂場玩摩天輪又嚇到懶尿要全部人番屋企幫佢地洗白白同洗衫, 好不歡欣.
去親佢地屋企背景音樂唔係叫聲就炒菜聲或喊聲永無安靜, 一係就阿爸發火鬧, 一係就阿媽罰佢地坐自閉圈, 兩隻野曳招層出不窮, 唔怪得師奶講野咁大聲.
20. 爸爸話生仔係每個人必須做既事, 咁地球上就會越來越多人爭天然資源, Victoria 已經唔夠食水, 政府勸市民只能沖四分鐘涼, 鐘意沖涼順手刷牙洗面柯尿既我點都要七分鐘, 如果人人不斷生仔好快就只可沖一分鐘涼, 洗西都唔夠啦!
不過睇相佬話我命中有子 (不過佢話我係淫婦 too), 唔好信佢! 不過佢話我會到外國發展仲話會有兩個國家有物業, 中左喎...
男友話我一定要同佢生仔, 係 " 仔 ", 生到有仔為止. " 囡就我教, 囝就歸佢 ", 做乜思想咁中國人架搞錯!?
唔駛生, 唔駛煩 唔駛花錢 唔駛教 唔洗照顧多樣野 唔駛怕學壞 唔駛為細路問題同老公嗌交破壞感情, 自己又可以安靜做自己想做既事, 冇人通屋跑打爛野嘈生哂...
不過將來既事冇人知, 總之而家我好唔鐘意 BB, 百害而無一利. (枉我之前設計孕婦裝同童裝)
Chatboard (0)